凍冰冰最好做咩？最正緊係打個邊爐暖笠笠，宮廷秘藏鍋物聽個名都架勢，一於去試下呢間灣仔既火鍋店。
一出黎已經見到電梯門成個中國式既大門一樣，好似自己要入宮廷咁樣，仲有幾個小鑼鼓做裝飾好有中國風。
一出去就係整刺身既地方，旁邊好多水缸，打上左藍色燈好有時代感，入面最搶眼一定係隻勁大大大既蟹。
設計古色古香但又有現代感既細節，除左用上左好多掛既燈籠，仲有好多唔同既裝飾都係古中國設計，但係又用上左唔少彩色射燈，營造左個好似Disco既感覺。
旁邊都有個小酒櫃，呢度既酒類都幾豐豐，日式西式都有好多款可以揀，一邊打住邊爐一邊飲就最正。
餐具同裝飾都好細緻，燭台甚至係紙巾盒都用上左馬賽克既容器，而亦都好細心咁預備左大匙俾我地撈野食。
連加湯既壺都用左古式長柄壺，勁有風味。
一黎緊要混醬，成個架有九款再另加豉油，一拎埋黎真係超多款揀，有麻油有麻醬，仲有辣油，最正緊係要狂多蒜同辣椒喇。
懶得諗下叫左個《刺身和牛極尚套餐》($888)，刺身有呑拿三文同油甘魚，二人餐每人都有兩大舊，夠厚切同新鮮。
湯底就揀左叫左花膠鯊魚骨鍋，好多料飲一啖好鮮甜，就咁撈一撈已經見到勁多鯊魚骨，仲有幾舊大花膠一齊煲，食埋夠養顏。
主菜當然係日本鹿兒島和牛，二人餐有六舊，捲埋左之後放係冰碎上面保溫，撈一撈就可以食，油脂分佈好靚牛味足又夠嫩。
海鮮拼盤有帶子象拔蚌珊瑚蚌等等，各樣都好新鮮，帶子燙一燙好鮮味，蝦好大隻又唔會梅身，珊瑚蚌等等都好爽口。
仲有手打墨魚丸鮮蝦丸同鯪魚丸，每人都係有兩粒，撈起之後依然係好大粒，三隻都好彈牙而且食得到好足料。
仲包埋左超大盤既蔬菜盤同菇盤，菜都好新鮮，可以落埋蕃茄令個湯更鮮甜，但係紫薯要遲少少落唔係個湯會變哂色。
最後要食埋個烏冬，好細心咁俾左個淥烏冬既兜，放哂落去淥完就食得，唔駛係個鍋度撈黎撈去咁辛苦。
店名：圃鍋
地址：灣仔軒尼詩道314-324號 W Square 4樓
即刻入去Like & Share埋我地既其他頻道喇
Facebook: KJFOODLIFE飲食玩樂地圖
Instagram: KJFOODLIFE
Website: KJFOODLIFE飲食玩樂地圖
Openrice: KJFOODLIFE
Ublog: KJFOODLIFE飲食玩樂地圖
歡迎報料同合作:
Email: kjfoodlife@gmail.com
Mobile: 63525193
餐牌:
沒有留言:
張貼留言