同朋友遲遲既開年飯上星期先食，去左旺角樓上餐廳，見到幾靚就打算試下，誰不知換左餐唔係太好回憶既開年飯。
其實餐廳一直都推左好多優惠，放哂係門口話俾大家知，餐廳唔算話十分大，都好爆場諗住都唔會死得去邊架喇。
我地五個人叫左個《4人movenpick套餐》($676)，因為見到都好多4人餐都夠哂食，餐湯係正常既，南瓜湯都幾杰身同濃南瓜味。但沙律好乾得兩滴汁，完全係乾食咁。
加左$48要左小食拼盤，薯條魚柳都好乾，用既粉醬都幾厚同就唔到時間黎炸，腸都黑黑地同埋摷哂皮，得雞翼正常。
全個餐最好食既主菜相信係《黑鑽石薄餅》，黑色薄脆批底，加左好多芝士同黑松露夠香，菇批有冬菇雞髀菇同白菌。
另一個《黑毛豬柳忌廉拿破崙意大利飯》，意大利飯煮得太過淋，而個汁都唔係太香，黑毛豬整得太細粒同份量都唔多。
意粉就有《粉紅胡椒大蜆忌廉白酒扁意粉》，意粉質感唔錯不過白酒味唔夠令到個粉幾淡，大蜆都幾細隻加左粉紅胡椒幾惹味。
最大惡夢一定係最後上既《澳洲T骨牛扒配黑松露醬》，牛扒見到已經好乾，明明叫五成入面直情係熟過全熟，完全overcook，跟果個仲唔似係黑松露醬似燒汁。
小食再加左個《黑松露拉絲芝士薯條》($68)，黎到時賣相已經一啲都唔討好，食落真係濃到喊，仲要上面既芝士整到濃哂邊一忽拉絲呢。
野飲就正正常常既，叫左最特別既《藍沙乳酪沙冰》，成個底都係藍色真係幾靚，不過飲過第二間既藍白相間成個天咁就差少少喇。
除左野食唔得服務都唔係好得，一次過係咁黎哂野食張枱根本完全唔夠放，我地已經係三張台放四人餐，另外叫左野飲未黎就追下佢，無睇過就話黎緊整緊，最後不了了知，再追先發覺原來漏左單，未食完野就問食咩雪糕好似趕人走咁。
店名：EAT ME Bar & Restaurant
地址：旺角彌敦道560號譽發廣場5樓全層
即刻入去Like & Share埋我地既其他頻道:
Facebook: KJFOODLIFE飲食玩樂地圖
Instagram: KJFOODLIFE
Website: KJFOODLIFE飲食玩樂地圖
Openrice: KJFOODLIFE
Ublog: KJFOODLIFE飲食玩樂地圖
歡迎報料同合作:
Email: kjfoodlife@gmail.com
Mobile: 63525193
餐牌:
沒有留言:
張貼留言