連鎖餐廳黎講simplylife都係得體又保持到水準既一間，裝修得好睇有氣氛之外，去過幾次服務都唔錯幾有禮貌又幾醒去主動幫你。因為唔想到時無位一早用左The Gulu app訂位。
今次去左九龍灣店，門口用左簡潔既白色同木去做主色，就算係暗黑既角位都依然感覺光猛舒服，仲有大大個招牌名離遠一睇就見到。
一入門口就會見到麵包店，排到整整齊齊既方包好吸引，雖然只係位處餐廳一角，但係成個地方都好闊落買得好舒服。
入面用上左好多花花草草既佈置，仲有唔少架裝左會用既材料，善用空間得黎又唔會令人覺得好奇怪，仲可以當係裝飾既一種。
成間餐廳都好光猛，座位都尚算闊落，仲用上左Open Kitchen，望到哂成個整野食既過程，但係抽煙做得好好完全無整出黎。
最正係一黎有麵包食，個提子味聞都聞到好香食落亦軟熟，入面仲有粒粒提子，另外果隻就較硬身，可以搽上牛油一齊食。
仲有餐湯都唔錯，蕃茄味好濃郁唔會好稀身，入面仲加左香草調味更加香口。
第一份主菜《燒美國安格斯肉眼扒》($208)，有成10安士真係激大塊，網紋面好靚仲好有油脂，加上薯條同大大條蘆荀做配菜，成碟真係好有份量。
切開之後入面五成熟仲係紅卜卜，見到都好吸引，雖然有啲根位但係肉賣食落都唔會好韌岩岩好，不過有啲啲咸。
反而無預計過既《茄香燒虎蝦手製扭紋粉》($138)又幾高汁，虎蝦已經去殻方便食，燒香埋更惹味，扭紋粉軟身茄味好濃好入味。
最後有《大蝦海鮮冬蔭有機糙米飯》($138)，煮到好多汁既意大利飯口感，有大蝦青口同蜆，食落有微辣既冬蔭公味。
當然唔少得招牌既飲品冰茶喇，食完微微辣既飯加上凍冰冰既野飲真係一流，仲有大大舊西柚一啲都唔慳料。
店名：Simplylife Bakery Cafe
地址：九龍灣偉業街33號德福廣場1期P26號鋪
即刻入去Like & Share埋我地既其他頻道:
Facebook: KJFOODLIFE飲食玩樂地圖
Instagram: KJFOODLIFE
Website: KJFOODLIFE飲食玩樂地圖
Openrice: KJFOODLIFE
Ublog: KJFOODLIFE飲食玩樂地圖
歡迎報料同合作:
Email: kjfoodlife@gmail.com
Mobile: 63525193
餐牌:
沒有留言:
張貼留言