我作為呢個藍色既愛好者，一行過門口已經俾H8地下呢間藍色外牆餐廳吸引住，於是放工前就用左The Gulu訂位去食。
餐廳入面都用上左藍色，仲有白色為主既設計，望出去又係舊舖頭同好多人既厚福街，同入面既Grand都幾大對比，個感覺幾有趣。
成個餐廳最靚既一定係牆上既呢個鐘，勁大個仲好有英式古舊鐘既感覺，而且後面再加上左動畫不停咁播住，仲有掛燈都好精彩，呈現左古老氣息中間仲有剪影。
其他位置則以白色為主調，飲品吧旁邊放左唔少植物，仲有藍粉危既繡球花。牆上面都掛左好多古式古香既建築畫。
一望埋去就好搶眼既呢部機，原來係咖啡機黎，咁岩我地就坐正隔離，成程都望到店員沖咖啡好似睇表演咁。
餐牌或者台上既宣傳版都好有心思，畫上左好靚好色彩既公仔，另外餐紙好有形咁用上左紙幣圖樣，今次真係拎張錢黎當紙巾用喇。
小食整番個《芝士煎蟹餅》($168)，啲蟹鉗放哂出黎好靚，整整齊齊咁分佈住，一切起一拉就有拉絲芝士，仲有熱辣辣既蛋包住蟹鉗。
大大盤上既《西班牙海鮮飯》($298)，一見到呢度係二人份居然咁多料咁大兜，仲要擺相係夠靚，青口已經有成六隻真係一啲都唔慳皮。
仲有四隻大蝦喇，剝果時要試埋外皮既醬汁，入面既蝦好鮮，上面仲有好多隻蜆一齊食，雖然唔算大隻，不過隻隻有肉。
另外仲加埋火腿同蝦米，一聞已經聞到果陣蝦米既香味，成個飯咸香味加分，炒飯夠勻均，又唔會太濕身同乾身岩岩好。
甜品一定要食《什果麻糬窩夫》($108)，呢度只係半份仲有成份可以叫，窩夫成個心形咁好吸引，旁邊再加上生果。
窩夫外面已經好脆，入面仲要係麻糬勁煙韌，落埋蜂蜜同配上雪糕一齊食更有口感，生果都好多好豐富，居然會有無花果。
叫左兩杯野飲，第一杯係《抹茶拿鐵》($49)，就係用旁邊既咖啡機整出黎，加上濃濃既抹茶粉，再係上面畫上好可愛既拉花加分。另一杯係《荔枝mojito》($68)，下面放上左三舊大大粒既荔枝，加上有汽梳打水一齊幾好飲。
店名：La Postre
地址：尖沙咀厚福街8號H8地下
即刻入去Like & Share埋我地既其他頻道:
Facebook: KJFOODLIFE飲食玩樂地圖
Instagram: KJFOODLIFE
Website: KJFOODLIFE飲食玩樂地圖
Openrice: KJFOODLIFE
Ublog: KJFOODLIFE飲食玩樂地圖
歡迎報料同合作:
Email: kjfoodlife@gmail.com
Mobile: 63525193
餐牌:
沒有留言:
張貼留言