觀塘工廈樓上舖港式串燒專門店，全部都即叫即燒熱辣辣，一點完店員就係入面密密燒，最好幾個人飲埋野慢慢食。
入面個環境都幾大幾舒服，同埋隔左廚房都一段距離而且抽風做得好好，唔會成間店都一陣燒野既味道，可以叫完坐低慢慢傾。
附上左醬料點串燒，不過其實燒完加左調味都幾夠味，先黎一串《雞軟骨》($15)，加上少少鹽調味做頭盤菜岩哂。
再黎一串《粒粒墨魚丸》($15)，燒得外面金黃好靚仔，食落個質地都夠彈牙同埋唔會乾爭爭，仲要幾粒都大大粒夠抵食。
有至鍾意食既蔬菜《秋葵》($30)，用上左大大條既秋葵黎燒拎起手好重身，加上少少青檸汁同埋本身秋葵唔會燒到乾身。
當然要點既《厚切牛脷串》($58)，一咬落去真係感受到超厚身，燒得唔乾身本身個味已經好出，每次食串燒真係必叫牛脷。
另一個好多人叫既《燒白鱔串》($58)，一大條上燒到個皮隻色勁靚，個魚皮咬落都夠脆身，魚肉亦無燒到過龍。
除左肉類之外都有幾多海鮮可以叫，《燒大蜆》($55)入面有大約十幾隻，每隻都有滿滿既蜆肉，食落都幾新鮮。
仲有呢條黑媽媽既《墨汁墨魚腸》($15)，似係台式香腸既樣，食落都幾夠香味同埋黑媽媽真係幾搶鏡。
甜品叫左《燒芝麻湯圓》($28)，發現居然有得食燒湯圓，咬開熱辣辣外皮，入面啲芝麻餡涌出黎，芝麻香味好濃。
又係另一必叫《燒菠蘿》($18)，呢個真係每次食串燒都一定要叫，菠蘿最緊要係多汁，一咬啲汁仲多到爆出黎。
店名：鮮‧港式串燒吧
地址：觀塘開源道60號駱駝漆大廈3座5樓P室
即刻入去Like & Share埋我地既其他頻道:
Facebook: KJFOODLIFE飲食玩樂地圖
Instagram: KJFOODLIFE
Website: KJFOODLIFE飲食玩樂地圖
Openrice: KJFOODLIFE
歡迎合作或查詢:
Email: kjfoodlife@gmail.com
餐牌:
沒有留言:
張貼留言